Glencadam er til þess að gera fremur lítt þekktur framleiðandi á austurströnd skosku hálandanna, nánar tiltekið í bænum Brechin (íb. 7200) sem liggur á milli Dundee í suðri og Aberdeen í norðri.
Þessi verksmiðja er í töluverðu uppáhaldi hjá Viskíhorninu enda afar smekkleg viskí sem koma þaðan.
Eitt þeirra er þrettán ára, en það kom í fremur takmörkuðu upplagi, eða eingöngu sex þúsund flöskur á heimsvísu. Viskíhorninu áskotnaðist ein þeirra.
Angan: Þykk og mikil lykt, mikil um sig, minnir á smjördeigshorn, smjörlíki. Einnig mikil karamella og fremur sætt.
Bragð: Dágóður slatti af karamellu en einnig sítrusávextir í bland sem minna helst á greipaldin eða blóðappelsínur. Töluvert krydd.
Eftirbragð: Eikarkeimur og hnetur og þetta kann að hljóma undarlega í eyrum sumra en eftirbragðið minnir nokkuð á smjördeigshorn með smjöri, ostsneið og hindberjasultu!
Niðurstaða: Glencadam skilar sínu eins og vanalega. Frábært, klassískt hálandaviskí.
Viskíhornið 